" LALPA DIT ZÂWNG "

(Ephesi 5 : 17 ; Luka 2 : 14)

Hnuoi mihriem thina ansedawng kâra leng hai hin ieng thil tak am ana ei mamaw a na? Iengam ei țulin ei pawimaw tak ning a ta? Țhenkhatin, thiemna, hriselna, sum le pai hausakna ei lo ti el thei, khawvela ei la cheng sung hin chu ei ti ding hrim a nih.
Sienkhawm, ei Pathien thu chun hieng hai po po nek hin "Lalpa dit zawng iengam a na ti lo hre lem ro" tin ami hril ta lem a.
                        Chuongsa khawm chun mihriem hai hin ei ditzawng thila hin ei lo buoi ve em em a. Hla siemtu chun, "Ei thuneina țhanglo hmunah ei la buoi chun NUN sawl um tak ei lo nih" tin a hril a. Lalpa dit zawng tieng reng reng hi ngaituo na chang neilo in, mani dit zawng thil hai ngaituo in ei hun nei po po hai khawm ei khawral lem hlak a nih.
Samson chu a hung pieng hma a inthawk reng a Pathien mi, Nazareth mi ni dinga ruot a nih.
A hung seilien, Pathien thlarau in a țhuoi lai chun an hmelma kumhlun, Philistien mi hai ta din tuor hla um takin a che ve thei a. Sihal 300 a man khawm a, an mei a meiser a khitin, an hmelma hai leileta bu anchil laiin an suo a, an bu a akang nasa hle el a. Pathien thlarau țhuoia a um leiin thil nasa tak a thaw thei. Vawikhat chu Philistien mi hai khawpui Gaza khuoah a um ti an hmelma han anhriet chun an lawm em em a. Samson chu man thei ngei dinga an inhriet leiin, kul kawtkhar hai chu ankhar a, bel sunga sa umsa anga ngai in, man tasa angin an ngai a. Sienkhawm, Samson chu zanlaia thoin a kul kawtkhar hai le a ban hai chu phawiin, a put sawn ta a. Hebrai khuosak tlangah a hang sie ta dai a. A hmelma hai chun mak anti ta em em a; ieng lei am ei hang ti chun, Pathien thlarau a țhuoi a ni leiin a thaw thei a nih. Pathien Thlarauin a țhuoi lai chun hmelma hai mak ti khawpin a che rura hlak a nih.
              Pathienin a sukhrat vanglai takin Samson chun Timna nunghak chu a lo dit ta tlat el a. A nu le pain a sietpui ding anizie hrie in, an dan khawmin a ngen lui a, apa kuomah "Min neitir el raw, ka dit hle a nih" a ti tlat a (Roreltu 14 : 3) Samson, Pathien mi meu khawm chu a ditzawng thila chun anbuol el ta a, Lalpa ditzawng lampui a ngaituo thei ta naw a. Ringnaw mi nunghak Deliala a hmangai em leiin Pathien ipek a hratna tak chu a zawr hmang ta a, sal man a lo ni ta a, a mitmu hai an khel dawk ta a nih.
               Ringtu hai khawm hi Samson ang el hin ei ditna hai hin salah a mițhuoi lut mek a, Thlarau Thienghlim le sinthaw hmu theilo in Lalpa ditzawng nekin ei mihriem ditzawng hin suolah mi țhuoi lutin, ei thlarau tieng mit hi a mi kheldawk pek a ni naw maw?
          Ei nitin nun hi Lalpa ditzawng le ditnaw zawng a um kawp a, Khawvel ri chu anringa, Lalpa ri ruok chu a annem a. Zawlnei Elija kha Zezebel ți a Horeb tlangah an bi hmang lai khan, thlipui nasatak a hung hrang a,  thli a chun Lalpa a um naw, Lir a hung inhning a, lirhningah chun Lalpa a um naw,  Mei a hung suok nawk a, Mei a khawm chun Lalpa a um chuong naw a. A tawp a chun, aw innem tak el hi a hung suok ta a, "Hi lai hin iengam i thaw Elija?" a hung ti ta a (ll Lalhai 19 : 13b) Tirko Paula khawm kha, "A lekhathawn hai chu a khir in a khau a, a taksa ruok chu a suk nem a, a țawng khawm a pha hnuoi a nih" (ll Korinth 10 : 10) "Lalpa i rawlnem a mi ko na chu ka hriet" ti hla ei lo sak ta hlak angin, ei siet le țha hrietna khawmin a thlir hran thei a, in nghil ruol lo dam diei a Lalpa ditzawng ei hriet a ei zawm hi Lalpa ditzawng chu a lo nih.
              Luka 2 : 14 a chun, "Hnuoi chungah a i lawm bek bek mihriem hai chungah inremna thu inleng raw seh" to ziek ei hmu a, Lalpa lawm em em mihriem hai mihring ei lo hung ni el hi a hlu em em a nih. Ei thil ngaituo hi a thil a khan hlutna a um naw a, a dittu lungrila a um lem a nih. Samson khawm kha thlarau țhuoina nekin a ditzawng thil kha a len em leiin a hratna chu a chan pha ta a nih. Pathien lungrila mihriem hai hlut zie chu, a nau khat neisun mi pek phalna hi a nih.
                    Ei mani ang bawkin ei mihriem chanpui hai hi Lalpa i lawm em em hai anni ti hrie a, Isu Krista Chanchin Țha anhrieta, hringna annei thei na dinga thaw hi Lal Isu ditzawng le a lungril a lien tak chu a lo nih. Misuol hai țhanglova tlei thei lo a ni si a, "Beram zawngin thlaler a feng ka tih" ti chu ieng lai khawmah a lungrila sip liem tak chu a lo nih. Thuhriltu ropui D.L Moody khawmin "Khawvela hin mihriem hi pakhat chau khawm um sien, Lal Isu hi hung tho a tih" atih. Mi fel hai lam dinga hung ni lo, misuol hai lam dinga hung a ni na hi hang ngaituo chun, ama dirzawng chu a ni naw tawp. Chu leiin hieng an lungril hi a hnung zuitu hai hin ei put ve a pawimaw hle a nih.
"Chun, Isun a kuomah a hril a, "A mi tirtu dit zawng thaw le, a sin thaw zo ding hi ka bu a nih" (Johan 4 : 34) chuong ang taka ti ve thei dingin inbuotsai veng ei tiu khai.

Ziektu : Jringum Tuolor