" VAN RORELNA HMUNAH "

I Korinth 15 : 35 -52

Mithi hai chu iengtinam keithoin um an ta? Ieng ang taksa putin am tho nawk an ta? Ringtu le ringnawtu hai chu ei rengin la tho vawng ei ta,  Krista rorelna hmaa chun kan la ngir ding a ni si a. Hi damlai ni ngei a ei thilthaw hai po po chu asie le țha iengkim chu ei lan puong ding ani si a.
               Paula ngei chun a hril ta ang hrimin, nangma ngeiin i tu hlak khawm chu a thizet naw chun thununin a um ngai nawh, chun, i tu hlak hi ataksa a hung um nawk ding chu i tu naw a, a mu, a chi itu lem a, bu chi am ani, thlaichi dang khawm alo ni el thei. Nisienlakhawm Pathien chun a dit le pawimaw angin a pek ve hlak a, tisa po po hi tisa chi khat a ni naw a, mihriem tisa a danga, sa tisa a dang bawk. Chuong ang chun van taksa a danga hnuoi taksa a dang hlak. Anropuina khawm chu a dang ve ve a nih. Chuong ang pei chun ni ropuina le thla ropuina khawm an ang ve nawh. Iengkim ropuina a hran angin mithi thonawkna khawm chu chuong ang chu a nih. Țuoi thei a tu kha, țuoi theiloa keithoin a um a, chawimawi lova tuin, ropui taka keithoin a um a. Hratnaw a tu in, thilthawtheina neiin keitho in a um a, mihriem taksa a phumin ei um a, van taksa in keitho in ei um ta a nih. Chuong ang bawkin, Mihriem hmasatak chu mihring a hung ni tah. Adam nuhnung lem Isu Krista chu hringna petu thlarau chu a lo ni a, nisienlakhawm thlarau tieng ruok chu a um hmasa naw a, mihring tieng a um hmasa lem a nih. Chu hnunga chun thlarau  tieng chu a hung um ta a nih. (Genesis 2:7)
Mihring hmasatak chu hnuoi mi, pila siem kha a ni a, mihring pahnina chu van a mi a nih. Pila siem ang mi kha chu pila siem mi hi eilo ni a, van a mi ang kha, van mi hai chu an nih. Chun, pil a siem angna chu ei put angin, van mi angna khawm chu ei put bawk ding a nih. Ngaita u van thuruk ka hril ding cheu a ni hi, ei rengin in innghil (thi) kher nawng ei ti,sienkhawm ei rengin tawtawrawt nuhnung tak inring hunah chun sawtnawte in, mit khapkar suk danglamin um tang ei tih. Tawtawrawt chu anri ngei ding a nisi a, chu pha chun mithi chu țuoi theiloa keithoin um tang anta, ei ni hring le dam a la um tu hai khawm chu suk danglamin um tang eita, mi tukhawm a damlai a ei inhriet hlak angin inhrie vawng tang ei tih. Amiruok chu ei damlai ni a ei inhmangaina bing te ruok chu bo tang a tih. Hmangaina fawnvelna hun ni tang a tih ti Bible in ami hril dan a nih.
        Thonawkna taksa um dan ding ei hriet thei na Bible in a mi hril a, chu chu krista taksa thonawk ang kha ning a tih ti chau ei hriet a, krista thonawkna taksa kha, van hmun, chatuon hmun dinga suk danglam a ni a, hun le hmun in a dal nw a, a Pathienna thuoma inbel a nih. Sienkhawm van a a lawn hma khan a zirtir haiin a hmel an hriet a, en thei, them thei a nih. Thlahrang am ani anti a, "Thlarau in ti chun kei angin taksa le ru a nei ve nawh" a ti a nih. Chu leiin ei thonawkna taksa hin Isu Krista thonawkna taksa ang kha a ni ding anih ti Bible in a mi hril a nih.
               Chuong chun hmel danglamna tlanga khan chieng deuin ei hriet thei a, thi ta hai le hring dam a lakhmanga um Mosie, Eliza, Isu Krista hai inlarna khan a suk chieng hle a nih. Mosie kha thi tahnung a ni a, Eliza kha dam a lakhmang a ni a, Isu Krista kha thi hnung puonzai sila tho anih. Hieng hi ani leiin ei Lalpa Isu hung nawk hunah chun thi ta hai le hring dam a nghak zingtu hai chu suk danglam a um in ei tho vawng ding a nih. Mitin ei thilthaw ang peiin relpekin um ei ta, Lal Isu hmun mi buotsai pek a um ve dingin tulai tingtu hai hi ei inbuotsai in, har thar a hun ta takzet a nih, Lal Isu chu a hung ngei ding a ni si a.
             Sandam nau hai chatuon a anchengna ding van Jerusalem khawpui a chun thimna hrim um ta naw ni a, Pathien le Beramte lalțhungpha chu um lem tang a tih. Chuong chun sandam nau hai chun a rawngbawl tang an ta, a hmel ditum chu hmu tang anta, an hming chu an bawk a chuong tang a tih. Chun, zan um ta naw ni, khawnvar le ni eng khawm ngaita bawk naw nih. Lalpa Pathien chun anni chu en tang a tih. Chuong chun chatuonin hlim le lawm takin rorel tang an tih.
             Chuongchun, Genesis a inthawk a thupuongsuo ei en chun, ka Lalpa Isu Krista hi ama ngei a hung ding a ni si a, taksa neiin, hmutheiin a hung ding a ni a, a hung thut ding a nih, ropuitakin hnetu angin hung a tih. Chun, ama chauin hung nawng a ta, a vantirko hai le khawvel rorel dingin a hung ding a ni si a, tu ra seng rorelna ning a tih. Mitin ei thilthaw ang pei a relpekin um tang ei tih.

By. J Ringum Tuolor.
.......................................................