THIEMNA TEMPUL CHU EI KHAWTLANGA SIKUL LE KOLES HAI HI ANNIH

THIEMNA TEMPUL” CHU EI KHAWTLANGA SIKUL
LE COLLEGE HAI HI AN NIH

Baibula, “var chu inthim lai a hung var a, inthimin
chu chu a ngam nawh”, a ti ang khan,
Hmarkhawliena inthim le inrieng elvartu dingin
kum 1920 lai khan Bible school hmasatak chu
Bimu Tilla, Mukam kawla indin a ni a. Chun
Hmarkhawlien LP School le MV School hai ei
indin hnungin, kum 1968 khan HNU-Assam
hmalakna-in Union High School ei indin a nih.
Chu var chun inthimna chu damten a hnawt zam
tiel tiel a. Chu zova, mel lung pawimaw ei phun
nawk hai chu Edith Douglas School, AG High
School, Assapali School, PMS High School,
Covenant English School le PMS Junior College
hai an nih. Hieng hai hin mawlna hnawt zam
dingin Hmarkhawlien-ah an hung ngir a nih.
Chu thiemna var chun a kawlvel le kiltin a elvar a,
ei mawlzie le ei saruokzie dam ei hung inhmu
chieng a, theichang hna nekin thiemna zakuo
mawia inbel nuomna ei hung nei a. Chu chun hun
thar le nun tharah a mi hlangkai tah a nih.
Tuhin chu high sikul ei tlasam ta naw a. Junior
College ei nei ta bawk. Zirtirtu khawm ei tlasam
nawh. Lekha inchuk khawm ei tam tah. Nu le pa
hai khawma ei nau le te hai lekha inchuk sang le
bengvar dingin thang nasa takin ei lak zing. Chun
khawtlang nun le sakhuona tieng boruok khawm
a danglam tah.
Amiruokchu, thiemna tieng panga tukuma
Hmarkhawlien vengbuk ngirhmun hang thlir ei tih.
Vengsak-ah BA thawlai mi iengza takam ei um a?
Sapramveng-ah matric thawlai iengzam ei nih?
Vengkawi-ah pawlsawm pahni thawlai mi
iengzam ei um? Chun Sapthiekveng-ah zirtirtu
iengzam ei nih? Mission Veng-ah sawrkara sin
thawlai mi iengzam ei um a? Zion Street-ah MA/
MSc thaw mek mi iengzam ei nih? Tuikhur Veng-
ah BSc thaw ei um am? Lamllienveng-ah B.Ed le
Commerce inchuklai ei um am chu? Hebrai Veng-
ah dan inchuk lai mi ei um? MBBS exam a tling
ei um am? Annawleh, engineer thawlai iengza
takam ei um? Ei lekha inchuk dan hai nguktaka ei
ngaituo nawn nawk a tul ta takzet.
Aningei, Union High School hi sawrkar enkawl
khawm nisien, ei ta a nina le indinna san le a
thiltum chu a la danglam chuong nawh. Abiktakin
Hmarkhawlien le a sevela chenghaiin mantlawm
deuva lekha inchuktheina an neina ding le ram le
khawtlang ta dinga hmasawnna le changkangna
hmangruo thatak ni thei dinga an buoisai a nih,
UHS indintu hai khan. Chuleiin, khawsung
roreltuhai le mipuiin mawphurna lientak el ei la
nei a nih ti hi ei hriet zing nuom a um.
Cachar phaizawl a chau khawm “kan ram” ti ding
sunhang khat khawm neilo hai ta ding lem chun
education hi ei delchin ram sukhmasawnna le suk
changkangna dinga pawimaw tak hriemhrei a ni
a. Chun ei khawtlang ta dinga thiemna temple
chu ei venga sikul le college hai hi an nih.
Thangthar hung lien pei haiin thiemna thatak ei
nei theina ding le ei ram le khawtlangin
hmasawnna ei nei theina ding chun ei sikul le
college hai siemthat hi a chai pawimaw tak a nih.
Hi le inzawm hin HSA Barak Valley Jt. Hqtrs. le
Hmarkhawlien HSA Unit haiin mawphurna
insangtak ei nei a nih.