Ei thupui hung suklang hi "Ram chu Lalpa ta a nih" ti a nih a. Chu naw khawm chu, Sam24 ah chun "Leilung le a sunga thil um po po hi Lalpa ta a na, asunga cheng hai po po le hin." ti zieka hin iengkim hi ata vawng a nih ti chu hril tam le inzawtsei ngai loin ei hriet thei in, a suk chieng em em a nih.
Lalpa ta, ama ta ti a suk chieng nawkna bek bek chu, asiem a, chuong a siem hai po po chu enkawl le venghim tu din mihriem hai hi ruot annih ti chu Genesis ah ei hmu thei a nih.
Ram hi mihriem le tinreng hai din a pawimaw em em a, ram boin chengna ei nei thei naw a nih.
Ram leilung hi Pathien ta anih :
Leveticus 25 :23 ah "Kumkhuoa dingin ram chu zawr sawng ding a ni nawh, ram chu ka ta a ni sih a; ka kuoma khawsa mikhuol el in ni sih a." a ti a. Hi khawvel leilung hi neitu inti em em in ei lo um hlak a. Pathien chun rum ram neilo mikhuol ang chau in ni a mi ti a, Sienkhawm mițhenkhat hai chun ram nei hi ei duam thei em em a. Aneitu tak/nghet ei inti a, kan ram ei ti a ei inhukpui hai hi tangka sum a inchawk le nei ni hlak de inlakhawm, a neitutak le a bul tak chu Lalpa Pathien ta a nih.
Lal David chun mihriem lalna ram hi Lalpa ta a nih, khawlai hmun khawm lalna changtu (roreltu) an nei a phal pek a, sienkhawm, khawvel mihriem hai lalna hnuoia mi a nih. Lal hai chun Lalber Pathien chu țing anta, inzâng anta, thuneitu tak tak chu Lalpa ti hi a pawm dan a nih. David hin a lalna ram chu Pathien kut a a hlan a, a hunlai hin Israel chu a ralmuongin, a ropui vanglai khawm a ni a. David hin a țawngțaina ah "Aw Lalpa ram chu i ta a ni a, mi po po chungah chunghnungtak i nih" ati hiel a nih.
Pathien kuomah thilpek khawm Pathien i peksa pe let nawk hlak a nih ti thu a hril (1Chr 29 : 11-15)
Chuong anga neitu ni na Pathien kuoma a hlan tlat leiin, a ramah indikna, muongna, inremna le hlawtlingna a tlung nasa hle. Pathienin a ma le a ram chu a suk ropui ta reng a nih.
Hebrai hotu hai khawmin neitu nina chu mihriem hai chanvo nilovin Pathien chanvoa ansie lem a, keinin- ka in, ka huon, kanau, ei ti hlak a, neitu tak le chawngpu a ei in ngai thei em em hlak a. Pathien chu iengkim neitu an ngaia, neitu tak a insalna țawngkam hrim hrim hi anbauin ansuo ngai naw a nih.
"Huon ram ka enkawl" anti a,
"Ka naupa" ti nilovin "Naupa ka kuomah um" anti a. A neitu tak pathien ani a, hun iem ani sunga ding chau a enkawltu sinthaw a an in ngai hlak a, an insuk chawngpu run run ngai naw a nih.
An chengna ram khawm, Pi-le-Pu hai kuomah Pathienin a pek ram anih anti a.
Sam 45 na a ei en chun mihriem chengna leilung le rorelna, lalram hi "I ram" ti hai "ka ram" tiin an inhril hlak a, a phak aw zawnga chun a phakin ei tluk naw hle a nih.
Nebukadnezar thlir dan :
Nebukadnezar chun "Hi Babulon ram ropui hi keima hratna ngeia lal chenna hmun a ding le ropuina mawina dinga ka siem suok a ni naw am a ni.?" a ti a. Hi Lal ropuitak hin ram chu ata dinga mawi le a ropui nan a ngai ve ta dai a, intineitu takin, "Ka siem ani naw am a ni?" a ti.
Hi hi thlir dan tirdakum le ngaidan khawhlou niin Pathien in a ngai, van a inthawkin rawl a hung suok ta a, "Mihriem hai laia inthawkin hnawtsuok ning i ta, chunghnung taka chun mihriem hai lalna ramah thu a nei a, a dit taphawt kuomah lalna a pek hlak ti a hriet hma chun." a ti a. Babulon lal ropui chu a tlawm ta! Tun chen khawm hin lalna thlir indaklova mani hamțhatna dinga lalna hmangtu chu peitlakin anla umpei ding a nih.
Ei ni khawmin ei ram hi Lalpa ta a nih, a sunga a min chengtir ve ani hi ti hi pawmtlat inla, ei enkawl dan khawm hung dang dai met thei a tih.
Ei ram hmangaitu party țhuoitu hai khawm hin Lalpa ta anih ti le, Lalpa ta enkawltu sinthaw ka nih ti hi hre ve hai sien chu, ei ram hin tuta angah ngirhmun ang hin a ngir kher chu ring a um nawh. Tuta inthawk hin hma la țan hai sienkhawm a ra chu sik nghal ei tih. Ram neitu Lalpa dit dan "Rorelna dik chu tui angin luong raw seh" (Amos 5: 24)
"Rorelna țha chu thaw unla, thamna la naw ro" (Zak 7 : 9)
"Țhatakin lalin ro a rel chun ram chu a ngirsuok hlak" (Thuvar 29 : 4) ti hai hi hung tlung tang a ta. A tlingnaw hai in tlingtir le, a thiemnaw hai in kai sangtir, thawkrim le mitaima hai chun ara chu sik tang anta.
Tu lai khawm hin thuthlunghlui theology hi Thuthlungthar a inlet lovin mi tamtakin an fe tleng a, Ram thuthlung hai anti a. Thuthlung hlui ser le sang thu a anla um ve nawk nghal si. Thuthlung Thara hang inlet chun Lalisun- "hi ram hi ka ram ni sien chu ka țhuoihruoi han bei an tih" a ti ta lem dai a kannan ram chau a thlir ta naw. Chu naw khawm chu, "hnuoi le vana thuneina po po ka kuomah pek a ni ta" a ti.
"I ram hung thlung raw seh" ti a anchuktir khawm hi "I thununnah hi mihriem hai kuomah hung thlung raw se" a ti na a ni lem.
Khawvel ram chau ni lovin, mihriem nunram chen a khawm hin Pathien Lalram chu hung thlung thei dingin Pathien kuomah hni le thlung thei zingna lungril siem a um hi a ditzawng a nih.
Lal isu hin ram chu Pathien ta a nih ti chu a pawm a, Pharisai hai kuomah khawm Kaisar thil chu Kaisar kuimah pe unla, Krista thil chu Krista kuomah pe ro, a ti hiel a nih.
Hi hin khawvel sawrkarna le Pathienin thuneina an insem ang ti na chu a ni chuong nawh. Sawrkar thuneina hin Pathien thuneina inchupui naw raw se a ti lem a nih.
No comments:
Post a Comment