I RAWNGBAWLNA KHA HLEN RAWH

By.  Henry S.Chhuanhmingliana

Kan thupui ‘I rawngbawlna kha hlen rawh’ tih thu
hi Tirhkoh Paula’n ka Fa tia a koh, Timothe-a
hnenah thuchah hnuhnung leh fuihna ni fawma a
ziak a ni. Paula hian intihsiakna tha chu bei zo
tawh a, hlen a awm mekin a insawi a, a hun
tawp thleng mai dawn a a hriat avangin he thu
ropui tak hi Timothe-a hnenah a chah a ni. He
thu hi ngun taka kan ngaihtuah ho a thain ka
hria a, Tirhkoh Paula’n Timothea hnena athawn
nimahsela vawiinnia mite hnenah pawh hian min
thawn ve a ni tih hre reng ila atha awm e.
‘Rawngbawlna hlen’ tih hian, Paula’n Pathianin
tihtur a pek zawng zawng chu amah khan tizo
tawh a, bak nei tawh lo niin a inhria a, a kum te
a lo upa tawh a, rawngbawlna hun pawh hmang
zo, kalchhuaha Krista hnena chawl tawh mai tur
nia inngaiin, amah anga Timothe-a hian an
rawngbawlna la bakte chu chhunzawm a, hlen
turin a ngen a ni.
Hetihlai hian a rawngbawlpui Dema chuan a
rawngbawlna tlawm sanin khawvel a ngainat
avangin a lo phatsan mek bawk si. Chuvang
chuan Timothe-a hi fuih chak a, a rawngbawlna
hlen tura thu a chah hi a tul hle reng a ni.
Khaihlak leh tih hmaih awm miah lova khawvela
a rawngbawlna chu tizova, rinawm taka hlen
chhuak turin a duh a ni. Hei hi ringtuten kan
mamawh hle mai. A changa tha hluai, a changa
zuai leh thin nilovin, tha tak a hlenzo – chu nun
chu Kohhran hote’n kan mamawh em em a,
vawiin thleng hian kan tan thuchah pawimawh
tak chu ala ni ta fan a ni.
Paula hian Chanchin Tha hril hi angai pawimawh
hle mai, “A hunah te, a hun loah te hril rawh,”
tiin a fuih a, chu hna chu vawiin thlenga ringtute
hna pawimawh ber a la ni ta zel a ni. Pathian
khawngaihna avanga chhandamna changtute
tihtur, kan duty (kan tihmakmawh) tur chu a ni.
Rawngbawlna hlen tur chuan Kohhran aw hi
Pathian aw ah kan ngaingam tur a ni. Kohhran
hote’n chanvo hrang hrang min siamsak te hi
Pathian ruatah kan pawm thiam a, kan ngaihhlut
thiam a, rinawm leh dik taka kan hlenchhuah a
ngai. Kan chanvo a te emaw, a lian emaw lamah
Lalpa lungawina a awm lo va, rinawm leh
diktaka thiltih hi Lalpa lawmzawng a ni zawk.
Ringtu rinawm hi Pathianin a ngaihlu em em a
ni. Thlemte chungah i rinawm a, tamtak
chungah ka awmtir ang che, i pu lawmnaah lut
rawh (Mat. 25:21) Ringtute chu mite thlir reng
(entawn) kan nih avangin, thil hote (tlemte)
chungah pawh kan rinawmin kan dik tur a ni.
Tunlai khawvel hlawhtlinna leh hauhsakna hian
Rawngbawltu tam tak chu Dema angin min hruai
bo a, min ei chhe mek anih hi. Lalpa
rawngbawlna hlen tur hian rinawm tak leh dik
taka rawngbawl a pawimawh hle, a changa sim
a, a changa sim leh lo, a changa rinawm a,
rinawm leh lo, a changa phur a, phur leh tawh lo
ti mai mai chung hian rawngbawlna hi
hlenchhuah theih a ni lo. Rinawm tak leh chhel
taka thih thlenga, a tana rinawm turin kan inpeih
tur a ni (Thup. 2:10). Pathianin a mai mai a
rawngbawl a duh lo. Mite hmuha tha (pawnlanga
tha) hi Lalpa’n a ten a ni. Tunah hian rinawm leh
dik taka rawngbawltu Lalpa’n a zawng mek a ni,
kan tling dawn em? In enfiah ang u. A sawi chu
kan peih khawp mai, sawi pawh kan sawifiahin a
tui pawh kan tui, asawi thiam zawnga thlir
pawhin kan thiam khawp mai, kan phur zawngah
chuan kan thawhhlawk hle a ni thei, mahse
Pathian chuan kan hunawl chauh nilo, kan phur
chang chauh nilo, englai pawha a tana rinawm
mi, a rawngbawlna hlenchhuak thei mi a
mamawh. I thu chuan thiam a chantir ang chia,
I thu vek chuan thiamloh a chantir bawk dawn
che asin (Mat. 12:37) vawiin a kan rawngbawl
danah hian Pathian hi a lungawi ang em?
Thu ropui leh tha tak tak zawm atana tha em
em, kan sawi kur dup dup a, kan rawngbawlna te
chu a tha in hei chu a lallukhum a va’n chhah
dawn em.. tih tur khawpin kan sawi tha in kan
thusawi te pawh a ril thei khawp mai,
amaherawh chu ataka nunpui hi kan tlem hle
thin zawng a nih hi. Jacoba chuan “Thu ngaithla
tu mai ni lovin, a zawmtu lo ni zawk rawh u”, tia
min chah hi I hre reng ang u.
Kan thusawitu ropui tak tak leh speaker tha tak
takte pawh hian kan thusawi turte hi ngun taka
kan ngaihtuah atha khawp mai, a no zawng leh
kan memberte an na palh anga, rawngbawltu,
Upa atang hian ka tlak phah palh ang… tih rilru
pu chunga thusawitu nimai lovin, Vanram kai na
tur anih phawt chuan na deuh pawh nise,
huaisen takin kan rawngbawlna tura Lalpa min
pek kha I hlen chhuak mai ang u. Tam tak chuan
kohhran hote rilru tihnat hlauvin Pathian thu a
nihna ang pawhin kan sawichhuak ngamlo fo
thin, hei hi thil pawitak a ni. Chung mite chuan
Pathian thinurna chu kan pumpelh hauh lovang
tih I hre reng ang u. Pathian rawngbawltu nge
kan nih a, Kohhran rawngbawltu. Pathian
rawngbawltu kan nih chuan Pathian thute a
nihna ang takin kan puang chhuak mai tur a ni
dawn lawm ni? Pathian thu hrul a, kohhran hote
rilru damna zawnga thusawi kual mai mai thin
kan nih chuan kan inngaihtuah ngun angai
khawp mai. Pathian rawngbawltu kan nihna ang
tak hian leh Pathian thu, Nunna, Vanram kaina a
nihna ang takin huaisen takin Pathian rawng kan
bawl mai tur a ni dawn lawm ni? Mahni theuh in
enfiah ang u. I rawngbawlna kha hlen rawh.
Lalpan a thu malsawm rawh se. Amen.