KRISTIEN SUNGKUO PAWIMAWNA

(Sam 68 : 6 ; Timothe 3 : 14-17)

1. Pathienin sungkuo a ngai pawimaw : Pathienin pasal le nuhmei a siem khan sungkuoban din nghal a. Mitin hi makhata um a phal nawh a, mimal tin chu sungkuoa an țhangtir hlak a (Sam 68:6) Pathienin mimal leh thutlung siemin sungkuo a theinghil ngai nawh. Entirna dingin, Nova kuomah thu a tlung khan an sungkuoa mi po po huopin thu a tlungpui a (Genesis 6:18) Abraham khan Pathien thutlung zawma a fesuok khan a sungkuo a țhuoi a (Genesis 12:5) Hi khela Lota kha Sodom khuo suoksan ding a hril a ni lai khan ama chau ni lovin an sungjuo a huop a (Genesis 19:12) Hieng lai huna hin mimal țha tak khawm nisien sungkuo leiin Pathienin a zil rawp hlak a nih (I Samuel 2:27-33)

2. Sungkuo chu Kohran hmasa tak a nih : Kohran (GK.Ekklesia) ti țawngkam chu fekhawm am ani, mipui inhmu khawm tina a nih a. Mipui inkhawm mei mei ni lovin, san țhatak nei a fekhawm, inhmukhawm an nih. Chuleiin, sungkuo chu kohran hmasatak tia hril a ni rawp hlak. Thutlung thar hun hmasa tieng a khan inkhawmna dingin in an hmang uor hle a (Rom 16:3-13/ l Korinth16:9) Inkhawmna ding Biekin ala umnaw leiin, inkhawmna dingin in anhmang hlak a nih. Chuleiin, sungkuo hi kohran ei ti phal chie naw khawmin Kohran hlimthla chu ani ngei el. Chuleiin, sungkuo leh Kohran hi nifa anga inpumkhat an nih.
        Pathien thil remruot dan hi a fel hle a, Lalpa thuruot chu andik el vawng a (Sam 19:9) Mimal sungkuo Kohran hi fel takin a rem a nih. Mimal a siem a (Genesis 1:27) Sungkuoa anțhang tir a (Sam 68:6) Mimal le sungkuo chu Kohran a  keikhawm nawk a (Ephesi 2:19) hmu thei Kohran chu hmu thei lova van Kohran leh a thlung khawm a nih.

3. Sungkuo chu School hmasa tak a nih : Pathienin sungkuo chu inchukna hmun ropui tak ni dingin a ruotlawk a nih. Nautein inchukna a țanna chu sungkuo a nih. Sungkuo chu school hmasatak a ni a, nu le pa chu inchuktirtu an ni a, inchuklai bu anni bawk. A hringnuna a hmang ding thuawina hai, invennahai, inngaihlutna hai, mini inthununna hai le Pathien thu anchuk a, a hringna ta dinga asie le țha a thlang theina hmun a nih. Sungkuo school țha a inchuk suok hai chun an puitling hun a khawm an inchuk thiem ta chu a bo ta naw a nih (Thuvar 22:6)
            Bu le pa hai chun inah anțhung lai hai, lampuia anfe lai hai, anzal lai le antho hun a hai annau hai chu an inchuktir ding a nih (Deutoronomy 5:6-9; 11:18-20) Judahai chun annau hai nautesen anni lai a inthawkin an inchuktir a, annu hai chun an nenetui le an intempawl kawptir hlak. Juda naupang lungril a chun dan thu chu an intu nghet em leiin an ni hming ngei khawm dan thu nek chun theinghil a awl lemin anhriet a nih. Naupangte hai ta ding chun sungkuo chu mani insung, khawtlang le kohrana an mawphurna anhlen suok dan ding an inchukna hmun a nih. Țhalai hai le naupang hai hi khawtlang siemtu ding anni a, khawvel lien lem hai thlirin sungkuo inchuktirna hi ngaitha deu deu in a um niin anlang a, hi hi thil pawitak a nih. Chuleiin, mani insungseng inbi thar nawk ei tiu.

4. Sungkuo chu damdawi in hmasatak a nih : Mitin hin ei hausa amani, ei rethei amani, mani in ei ngai em em deu vawng hi Pathien remruot a nih. Mani insung ei ngainatna hin sungkuo pawimawna a tarlang a, sungkuo chu hmun inhawi, inremna hmun, hlimna le damna hmun, vanram dawttu a ei ngai ti a tarlang chieng hle. Khuol khuoa ei inzin chang hai hin, inhawi eiti vieu amani,rinum eiti amani tieng nilovin mani in le lo ei ngai ngawi ngawi hlak a nih. Mițhenkhat chun mani sungkuo puotienga hlimna le lawmna anzawng hlak a, mani insungah anlut nawk hma po chu hlimna tak tak hmu ngainaw ni hai. Hi thu hi naupa tlanhmang khan hriechieng hleng a tih. Hlimna zawngin hmun hlatak a afeh a, a sum nei po po a hmangral vawng a, hlimna a hmu chuong si nawh. A tawpa vawkbu bel bulah anhmusuok a, a intieng kir nawk dingin thutlukna a siem ani kha. Ansungkuoa a kir nawk khan lawm taka lo lawmlutin a um a nih. Naupa tlanhmang khan sungkuo hi hlimna le lamna hmun ngei a ni zie hrechieng hle dingin ring a um. Ei sinthawnah a ei lo sawl a, ei taksa a lo nat deu chang hai, mihai laka lungril natna ei nei chang hai khawm hin mani insung ei tlung chun ei dam huoi huoi hlak. Chuleiin, sungkuo chu damdawi in hmasatak a lo nih.

(Mi in nu a hmangainaw chun nau anina hre ngainaw nih.
Mi in pa a hmangainaw chun nu hmangai thei naw nih.
Nau chu Insung anih a, Nu chu Kohran a nih. Pa chu Pathien a nih)

Ziektu J Lalringum Tuolor.