Lo Hriet ve mei mei dinga tha

HMAR HNAM DÂNA INNEI DÂNHAI

Hmar hai chu pasalin nuhmei nei a ta, nuhmeiin a nu le pa in suoksanin a pasal intieng inlawi a tih. Hmarhan nuhmei pasal innei dân chi nga an nei, chuonghai chu:-

1. Sâwngpuia thuoi
2. Chawngmova Lâk
3. Kohran dâna innei
4. Inrûk le
5. TlunHieng innei dân chi nga hai laia a ieng ieng dân khawm hmanga nuhmei pasal innei chu nupa an nih a, inrem lova insûng khataan khawsa thei tanaw chun inthe dân kawng khat bêk hmangin chungthu rêl ninga tih.

1. SÂWNGPUIA THUOINu le Pahai inbiekrem le buotsaina hnuoia nuhmei pasal innei chu Sâwngpuia thuoi a nih. Pasal nu le pa chun nunghâk nu le pa kuomah thingpui inlumin mo va bieng an ta. An inbiekrem thei ani chun thirdam an sie ding a nih. Innei hun le ni ruot nghâl an tih. Chu thirdam chu puonbil amanih Hmarâm amanih, annawleh puonthle phawt phawtin an tuom ding a nih. Innei ni chun man le muol khumin mo chu thuoi an tih. Sâwngpuia thuoi mo chun sâwngvawk a sawm ding a nih.

2. CHAWNGMOVA LÂKNuhmei pasal neithei ruol a tling hma daia a nu le pa remtina ngei a tarpi a tarpu ding in an naupa nuhmei dinga thîrdam an sie kham zet zeta an lâk nghâkhlakte chu Châwngmova lâk a nih. Pasalnei thei ruol atling phal leh man le muol khumin Sâwngpuiin thuoi an tih. Chawngmova lâk nuhmei chu a tarpi a tarpu inah khawsa sien khawm, Sâwngpuia an thuoi hmân a pasal ding le an inriek hmunkhattir ngai nawh.

3. KOHRAN DÂNA INNEINu le pa inbiekrem le buotsai Kohran dâna lekha târa Pastor hmaa kut insui chu Kohran dâna innei a nih. Mo an biek nin thîrdam sieng an ta, man le muol khawm innei ni a tlung hman khum an tih.

4. INRÛKNu le pa inbiekrem le buotsai ni lo, Kohran dân hraw bawk lova nunghâk le tlangvâl nupa dinga inthuruola tlân annawleh tlangvâlin nunghâk chu nuhmei dinga a inaa thuoilût chu inrûk a nih. Inrûka innei dân hin thîrdam sie a ngai ta nawh a, man le muol ruok chu an khum ngei ding a nih.

5. TLUNTlun dâna nuhmei pasal innei chi hnih a um.A. Pasal tlun leB. Nuhmei tlun.A. Nuhmeiin pasal anei dinga tlangvâl a hlukhum chun a tlun a nih. Pasal inah Zân a riek thei chun, pasalin zâlpui sien zâlpui naw sien, a tlun hlawtling a nih. Nuhmeiin pasal a tlun hlawtling chun man le muol chawi a ta, an fêtir nawk chun mâkman a pek ding a nih.Nuhmei in pasal a tlun hlâwsam a, zân rieklova an hnawtdawk nghal chun hmaimawkman Rs. 500 leh an thakkir ding a nih. Pasal tlun hlawsam nuhmei chu naupai an ta chun tlangvâlin sâwnman chawi belsânga tih.B. Pasal in nuhmei anei dinga nunghâk a hlûkhum chun a tlun a nih. Sûtpuiaha mansa a bâng theia, zân a riek thei chun, nuhmei chu zâlpuiin zâlpui naw sien, a tlunhlawtling a nih.

1. Pasalin nuhmei a tlung hlawtlinga, kum hnih a tarpi a tarpu inah ngam taka a khawsa chun kâwng a hlaw zo nîng a ta, man le muol a châwi ngai naw nih.

2. Kum hnih a tling hmaa intum a suokpui nâwk el chun man le muol a chawi ding a nih.3. Pasal nuhmei tlunin hun iemani chen hnunga a suoksan nâwk el chun mazu meidâwkin kut ruokin suok a tih.4. Nuhmeiin a tluntu pasal kha hun iemani chen hnungah a hnawtdawk, a tirsuok nâwk el chun hmaimâwk man Rs. 500 pêng a tih.5. Nuhmei a tlun leiin pasalin a chi le hnaminhmang naw nih. A nauhai khawmin an pa hnam hming put zing an tih